“Ky do bëhet avokat si gjyshi, jo do të bëhet inxhinier si babi, jo ai do t’i ngjajë dajës?” -janë shprehje që i dëgjojmë shpesh t’u drejtohen fëmijëve të vegjël nga prindër, gjyshër apo të afërm. Edhe kur vijnë me dashamirësi, këto pyetje e konfirmuese nuk marrin parasysh se si i përjeton fëmija dhe çfarë ndjesish krijojnë tek ai.
Fëmija është ende i vogël. Nuk jeton dot i vetëm, nuk e njeh ende mirë gjuhën, dhe papritur përballet me pritshmëri për të ardhmen e tij. Këto mënyra të të folurit, sado të pafajshme të duken, e vënë fëmijën përballë një sprove të panevojshme, duke ushqyer dyshime e ankth. Në vend që të ndihmojnë fëmijën të bëhet vetja, e shtyjnë drejt një modeli që mund të mos jetë i tij.
Prindër dhe mësues, detyra juaj është të jeni mbështetje dhe siguri për fëmijët në rrugën e rritjes. Mos ua impononi dëshirat tuaja, edhe nëse janë të drejta, ato mbeten vetëm dëshirat tuaja, jo të fëmijës. Ndihmojini të zbulojnë kush janë, dhe të mos kenë frikë të jenë vetja.
Ky mesazh vjen nga pediatrja Lira Gjika, një zë i përhershëm në mbrojtje të fëmijërisë dhe të drejtës së fëmijës për të qenë vetvetja.
